早兩日就同史友們介紹到城門隧道發生嘅一件「大事」，就係警匪喺城門隧道口曾經展開一場槍戰，但撇除呢種大事唔講，其實城門隧道當年真係幾受歡迎架！

城門隧道今時今日係9號幹線嘅起始路段，亦都係連接住荃灣同埋沙田嘅唯一隧道，由1990年4月20日通車以嚟，呢條隧道收費都仲係好平，而且設計嘅路段同位置都相當方便，相對獅子山隧道順暢，深受駕駛人士嘅歡迎。咁到底有幾受歡迎呢？答案就係通車一個月多啲，就已經有一百萬次嘅車流量。

喺1990年5月26日，城門隧道嘅車流量就達到一百萬次，當時仲搵埋第一百萬位揸車經過城門隧道嘅車主，直接送咗一個車牌畀佢。一個月多啲嘅時間就有咁樣嘅車流量，真係唔簡單！直到2019年嘅數據為止，城門隧道嘅車流量仍然維持喺每日5萬3千嘅水平！

原圖嚟自網絡