尋日就係西安事變嘅主角之一張學良逝世嘅日子，阿史都同大家回顧咗一下佢嘅生平。呢位奉系軍閥張作霖嘅長子自幼就接受父親嘅指導，亦都入過奉天講武堂受訓，其後仲參與過多次奉系軍隊嘅戰役，立過唔少戰功。正當奉系嘅軍事實力到達頂點嘅時候，就先後遇上「反奉戰爭」以及「北伐」，奉軍節節失利之下亦都改變咗張學良嘅命運。

喺1928年6月，張作霖已經無法再阻止北伐嘅發生，當時宣佈會由燕京退守山海關外，仲已經打算搭火車返奉天。只係去到6月4日，佢喺途經皇姑屯車站果陣，就被日本嘅關東軍放炸彈炸死，呢件就係史稱嘅「皇姑屯事件」，對日本嚟講，呢件亦都係佢哋展開侵華嘅序幕。

得知父親被炸死之後，張學良極度傷心，而且張作霖被炸死嘅農曆四月十七日，亦都係張學良嘅生日。張學良痛苦之際，亦都講出「從此不過生日，把生日改了。」皇姑屯事件之後，張學良既想堅守父親遺志，同時更加想向關東軍報仇，於是就決心擺脫日本軍政影響，並且宣布東北地區服從國民政府。

原圖嚟自網絡