早幾日就同史友們介紹到,因為俄國嘅「十月革命」令到唔少原先喺俄國嘅貴族需要走難到上海,「羅宋湯」亦都因而喺上海落地生根;而冇幾耐又係因為戰亂,唔少上海人同埋俄羅斯人都走難嚟到香港,令到俄國餐廳同埋「羅宋湯」喺香港出現。呢個歷史背景,就令阿史聯想到「豉油西餐」。

西餐大家就應該食唔少,明明豉油又係中式傳統醬料,到底又點解會溝埋變成「豉油西餐」呢?原來所謂嘅「豉油西餐」就係由廣東人所創立,依家喺香港嘅茶餐廳同埋快餐店都好常見。如果要提到開創「豉油西餐」嘅餐廳,絕對就係廣州「太平館」。呢間喺廣州出晒名嘅、全國第一間嘅西餐館喺咸豐十年(一八六○年)創立,當年佢咃嘅創辦人徐老高本身就學過洋行嘅西餐,後來就改良嘅西餐嘅煮法,以醬油代替鹽去烹調牛扒、乳鴿,令到本身唔鍾意食西餐嘅中國人都岩口味。結果,呢一系列用醬油烹調嘅菜式就被稱為「豉油西餐」。

後來因為日軍侵華嘅關係,徐老高嘅傳人亦都南下香港,喺上環開設店舖,繼續發展並且將「豉油西餐」傳到嚟香港。

原圖嚟自網絡