汕頭係全國著名僑鄉？

今次國家主席習近平到訪廣東之行，第二日就去到汕頭考察，除咗了解呢個經濟特區嘅設立之外，仲有回顧過去幾十年間潮汕僑胞對於家鄉建設嘅歷史。喺汕頭當地，就專門有一個博物館去講述昔日嘅僑胞點樣心繫家國故土、支持祖國家鄉建設。

睇到嚟呢度，相信史友們都會有一個問題，連習主席都要專程嚟到汕頭，讚揚佢哋嘅貢獻，到底汕頭有幾多僑胞呢？據統計全國大概就有6,000萬海外僑胞，當中既有早年被「賣豬仔」嘅僑胞，亦都有改革開放之後出外經商、求學、務工嘅僑胞。喺呢6,000萬僑胞入面，原來有成1,500萬人都係祖籍潮汕，所以又有「本土一個潮汕、海外一個潮汕、海內又一個潮汕」嘅講法。

唔單止數量上佔優，呢班僑胞去到海外之後都冇忘記家鄉，仍然不停寄錢返嚟投資建設。早年嘅項目就有汕頭騎樓街，而喺改革開放之後，汕頭亦都有唔少僑資外資，投資咗當地教育、醫療、房屋等領域6000個項目，「著名僑鄉」唔係得個講！