中環嘅吉士笠街相信史友們都會行過,可能亦都知道呢條街道係以香港開埠早年嘅翻譯家郭士立命名,早年主要係唔少裁縫、鞋匠嘅集中地,鄰近嘅擺花街亦都係當時著名嘅西洋風月場所。而關於吉士笠街,唔知史友們又有冇聽過吳亞嬌嘅故事呢?

一直以嚟流傳嘅故事係咁嘅:香港開埠前後,其實華南一帶都有唔少蜑家人聚居,當時呢班水上人並無好高嘅社會地位,從事嘅工作大多都係為外國商船打掃又或者提供補給,吳亞嬌就係其中一位。

當時吳亞嬌遇到一個人改變咗佢嘅命運,呢個人叫做James Bridges Endicott,係一位美國船長。吳亞嬌好快就同呢位船長建立關係,當時只算係涉外婚婦,但已經足以令到吳亞嬌唔再需要捱窮。吳亞嬌同James Endicott唔單止似夫婦關係,喺事業上吳亞嬌亦都幫咗佢唔少。根據記載,有次船長嘅八箱鴉片被海盜搶去,當時吳亞嬌單人匹馬去拎得晒返嚟,真係估佢唔到。

吳亞嬌同船長一齊嘅十年,一共生咗5個仔女,但去到1852年船長都係決定娶過第二個返去美國。佢心知自己愧對吳阿嬌,最後就決定將中環吉士笠街2-10號呢幾個雙數單位送晒畀吳亞嬌,連遺囑上都有寫明,所以當時吉士笠街又被稱為「紅毛嬌街」。

之不過,吳亞嬌後來就投資房地產,早期獲利甚豐,但就最後因為投資過度,破產收場,佢原本嘅物業亦都因為1878年12月一場大火被燒毀。

原圖嚟自網絡