呢排因為疫情關係，每年飛幾轉去旅行嘅史友可能都冇乜機會搭到飛機，有航空公司就睇中呢點，大玩噱頭！航空公司早排就推出「Flycation環港遊」，就會乘搭飛機喺香港上空盤旋，呢個消息一流出所有機票都火速售罄！

可能史友們都覺得呢個諗法幾新穎，去唔到第二啲地方旅行都可以搭下飛機，但唔講唔知原來時間返去60年前，曾經都有航空公司做過呢件事。網絡上就流傳住一張由資深傳媒人曾智華貼出嘅相片，其實就係一則廣告，講緊六十年前國泰就搞過一次「星期日天空遊覽飛行，環繞香島，鳥瞰港九」，當年就喺啟德機場出發，逢星期日早上11點都會有飛機起飛，仲要係每30分鐘一班。值得留意嘅仲有票價，當時一程香港飛返香港嘅航班，就需要當時20蚊港幣，真係係貴價活動！

原圖嚟自網絡及曾智華臉書