唔知史友們有冇留意到，其實尋日正係香港中文大學創校57周年嘅日子，呢間大學有唔少特別嘅地方，就好似中大係香港第一所研究型嘅大學，又例如呢間大學早年係合併新亞書院、崇基學院同埋聯合書院而成立。而最令阿史好奇嘅係，到底中大點解會叫做「中文大學」呢？

香港中文大學成立喺1963年10月17日，如果計埋成立中大而合併嘅崇基學院、聯合書院，甚至仲可以追溯到1845年。喺1959年，富爾敦先生（Mr. John Fulton）就應邀為三間書院嘅發展提供意見，去到1960年政府就通過《專上學校條例》資助中大前身嘅三院。去到1961年，「大學籌備委員會」成立，1963年富爾敦先生就做埋主席，建議設立香港中文大學，同年九月大學條例及規程完成立法程序，先至有中文大學嘅出現。

中文大學係繼香港大學之後嘅第二所大學，設有文學院、理學院同埋社會科學院，但呢度就有個疑問，點解會叫做中文大學呢？呢個問題要去到1978年第十九屆頒授學位典禮上先有創校校長李卓敏解答。

李校長當時就表示「凡是大學都不可能脫離本身民族的背景。因此，中國或海外華僑創辦的大學都是中文大學。每一所大學都是溝通本國和外國文化的橋樑，那是理所當然的。」而點解要喺香港特地命名中文大學，他就表示「香港中文大學特殊的地方在於中大是專門為了一個特殊的使命而努力；這個使命就是把中國的資料吸收和融化到各個學科，予以發揚光大；簡而言之，香港中文大學是把中國文化的境界溶合到各學科的大學。」

介紹完中文之後，李校長仲有講埋英文，他當時提到「凡是中國或海外華僑創辦的大學都是中文大學；但我們的大學卻是獨一的，因為英文名稱The Chinese University的The字用大寫T起頭，這就把本校的特殊使命表達出來了。」聽咗咁多年都冇諗到，原來簡單一個學校名，背後係有咁深遠嘅意義！

原圖嚟自網絡