1950年10月，中國人民志願軍投入抗美援朝戰爭，令朝鮮半島形勢出現好大變化，以美國為首嘅聯合國軍隊受沉重打擊，原本聯合國軍隊總司令麥克阿瑟話可以「返屋企過聖誕」成為空談，而响呢個時候，美國個邊就諗到一個方法對付中國。

呢個方法就係响朝鮮或中國投下原子彈。响1950年11月，美國方面已經有對使用原子彈嘅討論，而响11月30日一個記者會上，美國總統杜魯門表明聯合國部隊無打算放棄响朝鮮嘅「使命」，仲話將採取任何必要步驟以應付軍事局勢。有記者就乘機問佢「任何必要的步驟」係唔係包括使用原子彈，杜魯門就回答「一直積極地考慮使用原子彈。」

對於係咪用原子彈西方國家就有好大反應，最大原因係一旦使用原子彈，歐洲就有機會成為蘇聯攻擊嘅目標。之但係，美國的確就拋擲原子彈作出過準備。响1951年，美國就曾經調派携帶咗核彈頭嘅B-29轟炸機到沖繩，仲派偵察機到中國東北同山東上空收集資料，準備空襲。不過，杜魯門希望避免同中國或者蘇聯產生直接衝突，避免再有世界大戰。而响1953年，艾森豪威爾成為美國總統，佢雖然無放棄使用原子彈，但當時朝鮮半島局勢出現好大變化，因為交戰各方開始進行停戰談判，到最後响7月27日正式簽署咗《朝鮮停戰協定》。呢場原子彈危機亦就咁結束。

原圖嚟自網絡