香港股市受華爾街影響 爆發八七股災

股市嘅波動，甚至係股災相信唔少史友都唔會覺得陌生，但當年嘅今日就曾經發生過一場相當誇張嘅股災。呢場由紐約華爾街引發嘅全球股災，仲令到恆生指數暴跌近四成，喺香港引起唔少亂象。

隨住1984年中英簽署中英聯合聲明，香港嘅前途問題麈埃落定，商業、樓市、股市等等隨後幾年都穩定增長。點知去到1987年嘅10月16日（星期五），紐約道瓊工業平均指數突然大幅下跌，亞洲股市喺10月19日星期一嘅開市亦都出現恐慌性嘅拋售，恆生指數仲喺一日之內跌咗超過400點。

由於跌幅太誇張、情況太特殊，當時香港聯合交易所主席李福兆喺財政司同意下，就將香港股市停市四日，係全球主要嘅股票市場入面唯一一個停市嘅。之但係，咁做並無成功救得返香港嘅股市，喺10月26日重新開市當日，恆生指數再下跌超過1100點，市場上仲出現唔少收購狙擊戰、超級大供股，「七國咁亂」令到成個市場局面唔同晒，有機會再同大家詳細介紹。