上水天平邨倫常命案 陳健康事件源起

早排提到蘋果日報嘅時候，唔少史友都諗起陳健康事件，而尋日正正就係呢件倫常命案發生嘅22年。喺1998年10月19日，喺上水嘅天平邨就發生咗一宗倫常慘劇，陳健康嘅老婆因為不堪陳健康包二奶，憤然將分別10歲同埋4歲嘅仔由天平邨住宅14樓拋落樓殺害，最後連自己都跳樓身亡。

當時其實大家都未知道太多細節，警方確認到死者嘅身份後就即時聯絡陳健康，而陳健康當時嘅反應真係激嬲唔少香港人。陳健康當時就同記者表示，自己對老婆同埋兩個仔嘅死並唔悲傷，仲強調自己性慾好強，所以會定期周圍尋歡，亦都因為咁而識到二奶。而最令人氣憤嘅係，佢喺事件發生之後嘅第二日，仲揚言自己會重新生活，會同二奶結婚，當時廣大傳媒都叫佢做「人辨」、「現代陳世美」。

咁都仲未完，當時陳健康成為唔少傳媒採訪焦點，希望佢可以透露更多細節，佢先後就接受亞視、無線嘅訪問，喺節目中同果位二奶示愛，後來就接受埋蘋果日報追訪、拍攝一系列北上尋歡嘅相，收取過蘋果日報5,000蚊，被公眾質疑係「有償新聞」。當時就引起唔少傳媒道德嘅問題討論，事後蘋果日報都要公開道歉。