呢幾日阿史都同史友們講唔少韓戰果陣嘅歷史,由中國點解參與抗美援朝,再去到韓戰果陣美國點樣揚言要用原子彈對付中國等等,有史友就想阿史介紹下戰爭期間嘅一啲故事,咁阿史就揀咗一個人物嚟講。

黃繼光,呢個名可能對香港人嚟講未必太熟悉,但喺內地嘅課本入面,係學生必定會讀到嘅一個人物。黃繼光出生喺1931年嘅四川,由於家境太過清貧,所以幼年果陣都係受到地主欺壓,父親更加因為咁而貧病交加而死。直到1949年佢嘅家鄉解放之後,黃繼光成為咗村內嘅民兵,聽到1951年征兵展開抗美援朝嘅消息,佢係村入面第一個報名嘅人。本身佢就因為身材太矮小而未能通過體檢,但當時嘅營長受到佢嘅熱情打動,最後都係畀佢參軍。

去到前線嘅時候,佢係屬於中國人民志願軍第45師135團6連嘅通訊員,佢參與咗成場韓戰入面最激烈嘅一場陣地戰,就係上甘嶺戰役。經歷咗四日四夜嘅戰鬥,時間去到1952年10月19日,黃繼光就收到上級指令要喺黎明之前攻打到597.9高地。當時進攻正式展開,但中國人民志願軍一方就受到敵方強烈嘅炮火轟炸。

眼見時間已經係凌晨四點幾,假如唔喺黎明之前攻打到597.9高地,其他山頭都會失守。於是,黃繼光就決定自己帶上手榴彈同埋兩個士兵,一同向住敵人嘅火力點衝過去。敵人好快就發現咗佢,兩個士兵亦都好快就犧牲咗,黃繼光冒住無數嘅子彈同槍傷,成功炸毀敵人部分嘅機槍堡,而佢自己亦都受傷倒地。其他戰士見到呢個情況亦隨即展開進攻,但無幾耐敵人嘅炮火又令到志願軍無辨法進攻。

當時黃繼光就作出一個決定,自己企返起身,用身體塞住敵人機槍堡嘅2支槍口,其他戰士睇到呢一幕咁慘烈,都紛紛沖上去為黃繼光報仇,成功搶佔597.9高地。志願軍戰後清理戰場,發現黃繼光遺體仍然緊緊伏喺機槍巢射擊孔,全身已經血肉糢糊,而個樣都認唔到。由於佢出生貧苦,完全無影過一張相,就只好用呢幅畫像代替佢嘅形象,而佢事後亦都被中國人民志願軍領導機關追記特等功,並授予「特級英雄」稱號。

原圖嚟自網絡