嘩嘩嘩！今日晨咁早就睇到一個消息，其實都已經吹風吹咗好耐，就係國泰大裁員真係進行重組計劃，會喺未來幾個星期之內裁減約8,500職位，單係香港就會有5,300個員工被裁減，而國泰港龍仲會即日停運。聽到呢個消息，一年搭幾次飛機嘅香港人應該好有感受，特別係對港龍停運。

港龍航空嘅出現係有住好特殊嘅意義，港龍喺1985年5月由由商人曹光彪、包玉剛、霍英東、華潤同埋招商局等等組成嘅「港澳國際投資有限公司」所創立，當年成立航空公司嘅目的唔係單純想搵錢，而係想成立一間可以同英資航空公司競爭嘅中資背景本地化航空公司。

於是，港龍就以一億港幣為資本，喺1985年7月就開始營運，但無幾耐就被港英政府民航處阻撓，要求佢哋進行重組，即係將公司資本提升到2億，並且要由英籍人士擁有大多數股份，當時已經取得英國國籍嘅包玉剛就成為最大股東。其後港龍繼續有幾次重組，並且已經發展到可以經營定期航班同埋拎取獨家經營資格。當時唔少高利潤、高客量航線都被國泰航空拎晒，港龍就只係得返利潤較低、客量較少嘅航點，長年仲係虧損緊。去到1989年，據董事長曹光彪表示，港龍已經虧損達到23億港元。

睇到呢度，國泰航空就知道時機到，向港龍董事長包玉剛提出換股建議，希望港龍航空成為國泰航空全資附屬子公司。冇幾耐，包玉剛辭退董事局主席，同年亦都宣布出售港龍航空37.8%股權畀佢女婿蘇海文、曹其鏞。經過一輪資本重組，國泰亦都順利持有30%股權，成為第二大股東，1990年仲接管港龍航空管理權。

去到2006年6月9日，國泰就宣布斥資82.2億元全面收購港龍航空。當時港龍主要股東包括中國國航（Air China），國泰全面收購港龍，同國航達成協議成交國泰與國航變成交叉持股關係。港龍航空喺2016年改名「國泰港龍」，機尾紅龍已經冇再保留，轉咗做國泰一樣嘅「魚翅」，小飛龍圖案就只可以喺機頭見到。

原圖嚟自網絡