尋日就同史友們講到圓明園被英法聯軍焚毁160年,當年園內唔少珍貴文物曾經流落海外,近年既有外國人、亦都有愛國商人幫手之下,令到唔少昔日嘅園內文物重返中國,其中最為有代表性嘅絕對係十二生肖獸首銅像。

呢十二生肖獸首銅像係多年嘅中國政府都好想搵齊,部份人仲當呢批銅像係國寶。圓明園獸首原本就位於海晏堂前,由圖入面嘅畫像可見,呢批獸首每個都連接住一個人身像,屬於噴水池嘅一部份。可能有史友會問,點解圓明園竟然係用西洋風格設計嘅?原來當時海晏堂噴水池呢部份,係由意大利耶穌會會士清朝宮廷畫家郎世寧設計完之後,再交由清廷工匠製作。

呢個噴水池都大有來頭,佢唔單止係裝飾品,仲有水力鐘可以報時,十二生肖就係以八字形式喺水池前面排列,每個生肖都代表一個時辰,就好似子鼠、寅虎、辰龍、午馬、申猴、戌狗、丑牛、卯兔、巳蛇、未羊、酉雞同埋亥豬。而每當到咗果個時辰,相應嘅獸首就會噴出水柱足足一個時辰,正午時份十二個獸首都會噴水,你話幾壯觀呢!

自從1980年代尾獸首銅像首次喺美國公開拍賣之後,中國嘅商人亦都積極幫手競投,何鴻燊就係其中一位。目前為止,馬首、牛首、猴首、虎首、豬首、鼠首同埋兔首都已經重新返到中國;蛇首、羊首、雞首就下落不明;龍首、狗首就因為各種爭議未能證實真偽,所以十二生肖獸首仲未可以集齊!

原圖嚟自網絡