喺年初嘅「元旦大遊行」入面，滙豐總行就一度成為破壞嘅目標，總行大門嘅一對銅獅子更加成為示威者目標，「史提芬」同埋「施迪」就分別畀淋上紅色油漆同埋火燒，事後呢兩隻獅子都需要圍上木板進行修復。喺今朝早，匯豐銀行方面就宣佈兩隻銅獅已經完成第一階段嘅修復，可以重見天日喇！而今朝早主持揭幕儀式嘅，就有一位好特別嘅人物，就係滙豐御用風水顧問龍景銓先生。

冇錯啊，大家冇睇錯，係御用風水顧問啊！雖然滙豐係英資銀行，但喺殖民地時代，唔少嘅英國人都十分相信中國嘅風水學，龍景銓先生就更加係城中政商名人嘅御用風水師。龍景銓喺上世紀70年代就開始為滙豐銀行擔任風水顧問，成個總行嘅風水都係由佢佈局，佢早幾年喺滙豐為慶祝一百五十周年嘅時候，就接受過傳媒訪問，龍師傅當時就表示「英國人比中國人更加信風水」，所以新近擺放嘅石獅子同埋一件暗藏歷任滙豐大班肖像嘅巨型嘅米形藝術雕塑，滙豐都要佢幫手佢搵風水位擺放。

唔單止喺香港，龍師傅仲透露過早年英國金絲雀碼頭滙豐總行、上海新總部嘅風水，都係由佢指點迷津。早幾年滙豐被各式各樣嘅負面消息困擾，佢曾經就表示，滙豐總行嘅風水十分好，深信滙豐快將走出陰霾咁話！

原圖嚟自網絡