今日喺北京人民大會堂就舉行咗紀念中國人民志願軍抗美援朝出國作戰70周年大會，咁國家主席習近平就喺會上發表咗重要講話，提到呢場戰爭，佢就形容係中朝雙方喺「極不對稱、極為艱難」情況下，實施多次進攻戰役，仲抵禦咗「細菌戰」。而講話當中提到嘅細菌戰其實就大有來頭！

其實早喺一次世界大戰之後，德國就已經首次使用細菌武器，亦都因為咁各國之間就喺戰後推行一份《日內瓦議定書》禁止使用細菌武器。嚟到二戰，日軍就先後喺東北、廣州及南京設立研究製造細菌武器嘅基地，亦都喺浙江、湖南等地散播鼠疫、霍亂等病菌。去到二戰完結，美軍並冇對731部隊進行嚴厲追究，反而被指係通過咁換取咗日軍細菌武器研究內容。

1950年代韓戰爆發，喺韓戰嘅戰場上，中華人民共和國、朝鮮民主主義人民共和國指控聯合國軍利用炸彈、炮彈投放毒物、病毒、細菌等等，而最具爭議嘅一單就係喺1952年1月29日，一架美軍飛機飛過平康郡中國人民志願軍第42軍陣地，當時飛機冇投放炸彈，但係就喺雪地上發現多種昆蟲，有內蚤、烏蠅同埋蜘蛛等等，懷疑係帶有病毒，而陣地中後來不時有天花病菌、霍亂、瘟疫以及其他傳染病爆發，但就因為42軍衛生科技術設備及水平有限制，未能有進一步證據。

美方對於進行細菌戰嘅指控就採取否認，仲將當時喺英文週報《密勒氏評論報》指控美國政府「美國犯罪在南韓報告」嘅記者鮑威爾定為煽動叛亂分子。到底聯合國軍有冇發動「細菌戰」，嚟到今日醫學界都仲有唔少爭議，但呢個議題就成為當時兩軍宣傳戰嘅必爭之地。

原圖嚟自網絡