陳百強呢個名相信唔少史友都唔會覺得陌生,特別係佢喺置地廣場自彈自唱《有了你》嘅果段片段,今日睇翻都覺得「人靚聲甜」。喺當年嘅今日,呢位80年代粵語流行曲代表人物不幸逝世。

陳百強幼年就讀傳統名校聖保羅男女中學,仲同填詞人林敏驄係同班同學。佢自幼就有濃厚音樂天份同興趣,所以參加過唔少比賽同電視節目,一次機緣巧合下佢就參加由無綫電視舉辦嘅流行歌曲創作歌曲邀請賽,拎到得季軍,令到佢喺未正式踏入演藝界前就廣受關注。

後來佢就喺歡樂今宵演出、簽約為無綫電視歌手,去到1979年就正式加入EMI唱片公司,開始13年歌唱生涯。相對其他歌手,陳百強嘅歌唱事業係短暫,但佢唔少歌曲都係相當出名,就好似《眼淚為你流》、《有了你》、《漣漪》、《偏偏喜歡你》等,唔少仲入選埋十大中文金曲;與此同時佢仲參演唔少電視劇同埋電影,令到佢成為香港第一位被稱為「偶像」嘅人。

1992年5月18日下午,陳母發現陳百強喺寓所內倒臥昏迷,送院時情況危殆並轉入加護病房,懷疑係酒前服藥而中毒,期間心臟及呼吸曾停頓3次,腦部組織嚴重受損,只可以靠儀器維持生命。當時商台為佢舉辦「燭光祝福晚會」2,000歌迷到場為佢送上祝福。

1993年10月25日,陳百強因為逐漸性腦衰竭搶救無效,享年35歲。