尋日阿史就同史友們介紹咗近排喺國內強勢上映嘅抗美援朝電影《金剛川》，呢套電影係以志願軍喺金城發動嘅最後一場大規模攻勢作為背景，講述當時志願軍喺物資匱乏、武裝懸殊情況下，抵禦敵機狂轟濫炸向金城前線輸送戰力嘅事跡。咁歷史上呢場戰役又係點樣呢？阿史今次就同大家介紹下啦！

去到韓戰嘅後期，停戰協定簽字嘅1953年7月27日前嘅15日，志願軍就渡過鴨綠江展開一場大規模嘅陣地進攻作戰，觸發呢場戰役嘅起因係因為當時嘅韓國總統李承晚拒絕簽字同埋釋放約2.7萬名中朝聯軍俘虜。

當時嘅志願軍極為擔心呢批俘虜嘅安危，亦都對李承晚拒絕簽字呢件事相當不滿，於是就決定對金城地區發動大規模進攻。呢次戰役集結咗24萬人，集合咗1360門火炮，對住金城以南韓國第3、6、8、9四個師喺7月14日展開進攻。志願軍好快就穿過韓國國軍炮火封鎖區，摧毀當時嘅陸軍首都師，去到7月16日戰線向南擴展192.6平方公里。

見到南韓軍隊敗退，美軍就加入接防向志願軍連續反擊，喺27日為止嘅11日入面，志願軍同美軍、韓軍相互進攻反擊，但去到停戰為止志願軍都仲係守住新佔領嘅160平方公里地區，亦都令到後來朝鮮停戰協定落實簽署。

原圖嚟自網絡