近排疫情有所放緩，唔少港人都選擇假日出遊去到離島玩下，其中一個熱點就係位於大鵬灣、船灣淡水湖以北嘅吉澳。雖然依家嘅吉澳得返50人居住，當中大部分都仲係長者，但歷史上呢個地方曾經有成5,000人聚居。

喺地理位置上嚟講，吉澳係全港最接近內地嘅離島，小島就好似一個「之」字型咁，呢種地形就係一個天然避風港，所以早年都有唔少漁民住喺呢度。吉澳全盛時期就係上世紀50到60年代，據統計有成5,000人聚集，島上有成60幾間唔同嘅店舖，都幾興盛下！但後來居民就去到港九同埋海外居住。關於呢個地方嘅故事，其中一樣好得意嘅就係「沒水銅人」。

「沒水銅人」，又叫做「未水銅人」，係解做着咗潛水裝備嘅人。由於吉澳係四面環海，有住好豐富嘅漁獲，當中就數響螺、帶子最為珍貴。當時就有唔少村民着住一啲銅製嘅潛水裝備去到水底執響螺、帶子。唔好睇呢身裝備好似好簡陋咁，據當年村民憶述，只要連接咗打氣管，船上嘅人維持供氣，「銅人」就可以喺水下兩、三個鐘都唔上嚟，真係犀利！

原圖嚟自網絡