石鼓洲有個羅馬泳池？

石鼓洲呢個地名相信唔少史友們都可能已經聽過，甚至仲知道呢座芝麻灣半島以南嘅島嶼，喺1963年就有一間全港最大嘅戒毒治療中心——石鼓洲康復院開幕。呢個地方係專門為男性自願戒毒者提供治療，一直都被列為禁區，但自從1999年開始，每年11月先會舉辦一啲開放日畀學校或者社團參加，到目前為止呢道都仲係禁區。

咁阿史做乜冇啦啦提起呢個地方呢？之唔係喺網上見到一輯石鼓洲羅馬泳池嘅相流傳囉！係啊，大家都冇睇錯，石鼓洲上面真係有一個羅馬泳池。呢個泳池認真巴閉，整體係一個兩層高嘅拱門建築，泳池邊仲有三個古羅馬白色裸男像、動物噴水頭等裝飾。

呢個水池造功一啲都唔失禮，可能仲拍得住外國嘅建築，據講係由康復院前院長何漣瀝醫生提出，佢喺島上工作三十幾年，佢提出興建泳池，要島上居民用原始方法又剷又鑿、開山劈石，足足用咗三十年時間先起成。咁點解會冇啦啦諗起整個泳池，據講就係因為早年島上食水不足，起個泳池可以用嚟儲水，而起泳池嘅過程就可以畀啲島民有啲工作做下，一舉兩得。