螺螄粉呢種食品，聽到個名已經好似聞到隻味，亦都因為呢種咁獨特嘅味道，令到佢成為內地嘅網紅食品，就連近排KFC都推出埋獨有嘅螺螄粉。當中就有搞笑嘅一點，KFC就表示由於螺螄粉氣味特殊，所以都只可以外賣，冇得堂食咁話！阿史都曾經聞過螺螄粉嘅味道，當時果刻就諗，到底係邊位勇者發明呢種食物，今次就同史友們介紹幾個螺螄粉起源嘅講法啦！

呢種廣西柳州風味小吃係由柳州特有米粉，加上酸筍、木耳、花生、油炸腐竹、黃花菜同埋煮螺螄嘅湯水混合而成，有齊酸、辣、酸筍混合嘅味道，真係唔係人人接受到。關於呢種食品嘅起源，就有幾個可行嘅講法：

第一個講法就係柳宗元有關，相傳呢種粉起源唐代，當時柳宗元被貶官到廣西柳州，水土不服、不思飲食。當時府中大廚師周萬福就喺河邊洗菜果陣發現幾粒螺螄，於是就煮埋一碗螺螄粉，柳宗元食完就好鍾意，結果就就喺柳州廣傳。經過歷代改良之後，成為今日呢個版本嘅螺螄粉。

第二個講法就係發生喺上世紀70、80年代，當時柳州係螺批發最大集散地，甚至仲喺谷埠街形成夜市。柳州人一向鍾意食炒同埋螺螄，但兩樣溝埋一齊又係點樣呢？當時一位老闆就諗到，不如試下將兩樣煮埋一齊。結果呢碗粉就風行成個夜市，經過慢慢改良成為今日嘅螺螄粉。

邊個講法先係正確，今時今日就真係好考證到，但敢咁樣食嘅人，都真係幾勇敢。

原圖嚟自網絡