董卓其實係「策馬騎射智勇雙全」？

喺唔少歌影視作品又或者遊戲入面，對於董卓形象嘅描述都係話佢肚滿腸肥，身軀龐大，但事實又係點呢？喺歷史記載入面，董卓原先並唔係一個大肥佬，甚至仲係策馬騎射、智勇雙全，形象相當勇猛。

董卓，陝西臨洮人，二十歲左右從軍，後來就專責巡守邊塞，當時嘅董卓按史書描述就係一個天生神力、可以左右開弓嘅勇士，《後漢書．董卓列傳》就有一句「卓膂力過人，雙帶兩鞬，左右馳射」印證呢件事。亦都係因為佢咁勇猛，喺佢擔任涼州刺史從事果陣，就率兵擊破羌胡，冇幾耐就升為軍司馬，但後來又因為黃巾起義兵敗被免官。

董卓經常都要策馬上陣，到底佢有冇可能係一個肥佬呢？關於董卓肥胖，最經典嘅一個故事就係「董卓點燈」，由「建安七子」之一王粲所寫嘅《英雄紀》，部分喺《三國志注》入面就重新被呈現，當時董卓已被呂布所殺，負責守屍嘅官兵就突然將個火炬放到佢肚臍中央當油咁點，結果就係燒足幾日，仲令到室內好似日頭咁光。呢個故事聽落就有唔少誇張嘅成份，經過口耳相傳多年，甚至連《後漢書》入面都有記載到，令到董卓肥胖呢件事已經成為大家心目中既定嘅形象。