清潔香港運動全面展開 中環舉行火燒「垃圾蟲」

提起清潔香港運動相信大家都唔會太陌生，如果認真追溯，呢個活動最早就喺1948年就展開，每年都會有兩個星期為香港進行清潔。踏入60、70年代，當時政府就進行咗連串嘅地區清潔活動，創立咗「平安小姐」系列嘅宣傳人物，希望可以令到市民加強家居清潔、防治蚊患嘅意識。

年紀比較輕嘅史友可能未必識「平安小姐」，反而係對「垃圾蟲」比較有印象。嚟到70年代，政府就成立咗全港清潔運動委員會，而且就進一步加強設計海報同埋象徵標誌，「垃圾蟲」更加係當時嘅主打，由英國插畫師許敬雅（Edward Arthur Hacker）任職香港政府新聞處創作總監果陣設計出嚟。

咁垃圾蟲呢個形象除咗用喺海報同宣傳片上，仲有咩其他用途呢？喺1972年嘅今日，港督麥理浩喺中環主持咗一個「燒死垃圾蟲」嘅儀式，呼籲市民支持全港清潔運動，而呢個活動就被視為係清潔運動正式開始。