砵典乍街以前有防空隧道？

呢排唔少香港人都抗疫疲累，於是每逢星期六日都會出去搵啲地方玩一玩，除咗郊野公園之外，唔少古建築都係一大熱點，砵典乍街去到大館呢段路更加係大家最鍾意嘅打卡位。唔講唔知，其實以前呢條街唔係淨係得石板咁簡單，仲有埋防空隧道架！

砵典乍街，又叫做砵甸乍街（Pottinger Street），係以香港首位總督砵典乍命名，現時就被古物古蹟辦事處列為一級歷史建築。呢條街道由干諾道中連接住荷李活道，其中一段路由於相當陡直，所以就用到石塊舖蓋路面，呢種一凹一凸嘅設計既可以方便行人上落，亦有利排水，加上成個風格都幾復古，所以唔少後生仔女都鍾意打卡影相，甚至婚紗相都喺度影。

呢條被市民稱為石板街嘅街道，其實喺二次世界大戰之前係設立咗一條防空隧道，入口就大概係砵甸乍街中間，據講呢條隧道並唔係一個單一存在，地底係一個網絡連住中環區，而喺戰時防空隧道就畀日軍強行徵用，去到戰後就荒廢。到底入面係點樣，就真係冇人知喇！