近排就有一個唔係太好嘅消息,就係人稱「魚毛姐」嘅余慕蓮就因為肺纖維化、罕見血癌等疾病而入到深切治療部留醫,須依賴儀器幫助呼吸,唔少市民見到呢單新聞都紛紛集氣祝福,希望佢可以好心有好報。

「魚毛姐」余慕蓮曾經係大台嘅「御用賣菜婆」、「御用清潔阿嬸」、「御用醜婦」等等,亦都係唔少電影嘅甘草演員,喺港產片全盛時期唔少電影都有佢出場嘅戲份,佢嘅形像真係深入民心。余慕蓮經常都飾演一啲醜婦嘅角色,但佢直言唔會介意呢一點。睇到嚟呢度,年紀比較輕嘅史友可能會問,余慕蓮點解會咁深得大家尊敬呢?

原來喺2005年果陣,余慕蓮就曾經得到一筆由大台畀佢嘅二十萬元長期服務金,而佢就喺呢筆錢入面拎咗大部分用嚟喺貴州興建「余慕蓮希望小學」,亦都係畢節市阿市鄉第一間小學,呢次善舉令到唔少港人相當尊敬佢。余慕蓮曾經就講過,我唔係有錢,但我捨得捐。眼見魚毛姐嘅病情,真係希望吉人有天相啊!

原圖嚟自網絡