香港有唔少地方街名都係以人名為命名,特別响以前英治時期,好多街名路名都係由英文直譯過嚟。荃灣有條路叫德士古道,咁又係咪人名嚟呢?

德士古道英文係(Texaco Road),一睇就知係同外國有關,咁係咪人名嚟嘅呢?非也。德士古其實一間油公司嘅名。早於1930年代,德士古石油公司就响荃灣設立油庫,叫做德士古荃灣石油公司油庫,而個一帶就叫德士古灣。因為運輸需要,於是開闢咗一條道路,亦即係德士古道喇!呢條路亦係荃灣首條區内道路。到咗上世紀五十年代,因為荃灣進行填海同發展工業區,德士古道開始重修同擴闊路面,慢慢成為咗荃灣嘅交通命脈。

至於德士古油庫,就响1983年拆卸,幅地就發展成為大型屋苑海濱花園。

原圖:網絡