全球第二大戶外青銅佛像——天壇大佛

繼續同史友們介紹一啲香港、甚至係世界之最嘅建築物，繼上次同大家講完全球造價最昂貴嘅建築之後，今次就介紹下大家好大機會都會去過嘅天壇大佛。

呢座位於香港大嶼山寶蓮寺前木魚峰上嘅釋迦牟尼佛像，就咁由底望上去就已經覺得好壯觀。呢尊佛像座落喺海拔520米嘅昂坪，一共有成268級石階，整體嘅佛像連埋蓮花庭就有34米高，由207塊銅片組成，所以重量亦都有成250公噸，係僅次於台灣佛光大佛嘅全球第二大嘅戶外青銅佛像。

天壇大佛喺1990年動工，由中國航天航空工業科學技術諮詢公司設計同埋製作，當中就根據佛經如來32相設計，面相上仲參照咗龍門石窟盧舍那佛、衣紋頭飾就參考埋敦煌石窟第360窟釋迦牟尼佛像，真係盡取隋唐佛教全盛時期嘅造像。佛像歷時三年幾建成，一共就耗資超過6000萬，依家就已經係香港著名嘅景點之一，史友們如果得閒不妨可以去行下！