東深供水工程令香港解除長達60年制水

早幾日就係東深供水工程達成協議60周年嘅日子，喺1960年嘅11月15日，廣東省就正式同當時港府確立每年由深圳水庫向香港提供6,820萬立方米淡水，呢個協議嘅出現令到香港長久而嚟嘅食水短缺問題得以緩和，後來仲解除咗長達60年嘅制水措施。

東深供水工程，全稱就係東江──深圳供水工程，成個計劃就係一項喺東莞同埋深圳市境內建立供水工程嘅設施，為香港進行大型調水嘅工程。其實早喺香港開埠初期，食水不足已經係一個好嚴重嘅問題，就算多年嚟水務署起咗唔少水塘同埋水庫，但只要一面對旱災都係解決唔到。於是去到1920年代，港府就已經開始構思向廣東省購入淡水，而相關嘅計劃去到1960年代前後就由時任國務院總理周恩來進一步落實。

喺1959年11月15日，深圳水庫就正式動工，用上接近4萬名工人希望喺雨季之前完成主壩土方工程，結果去到1960年3月就已經完成咗近一公里長三十米高主副壩，準備好可以為香港供水。成個計劃發展到依家，喺1982年6月1日香港嘅食水供應亦都產生變化，就喺呢一日港府解除咗長達60年嘅制水，實現24小時供水。