繼續同史友們介紹香港嘅特別地名,喺九龍城區西部一直都有一個地名令到阿史相當好奇,而呢個地方正係「何文田」。

就咁由地理位置上嚟講,何文田嘅地理範圍就即係加多利山、十二號山同埋採石山之間嘅一片谷地,而依家仲包含埋佛光街、老龍坑北部等等,都係因為何文田邨以及愛民邨等屋邨落成而延伸出去。

咁回歸返最基本嘅問題,就係何文田點解叫做何文田呢?其實喺清代嘉慶二十四年刊行嘅《新安縣誌》入面並冇提到何文田呢個地方,當時應該冇太多居民居住,而據講何文田呢個地方嘅命名係同一個人有關。19世紀末期就有個居民叫做陳何文,佢並唔係普通居民,而係擁有成個何文田土地嘅人,佢將呢片土地叫做「何文田」,亦即係屬於佢自己嘅田。亦都有另外一個講法係提到,何文田呢片土地原身可能係一片雜姓村,由何、文及田三姓人共同擁有,所以溝埋就變咗做何文田喇!

原圖嚟自網絡