如果有史友們住喺沙田區,經過鄉事會路應該都會發現有條橋,呢條橋嘅名相當特別,係叫做「沙燕橋」。呢條橋嘅命名就真係有段故,早幾年仲有套電影用咗呢段故事拍成,今次阿史就同大家介紹下啦!

沙燕橋喺地理位置上嚟講係屬於沙田鄉事會路嘅其中一段,亦都係位於沙田城門河中游之上,連接沙田市中心同埋沙田圍。呢條橋嘅命名係同區內一支少年棒球隊「沙燕隊」有關。呢支全港第一支華人少年棒球隊喺1982年由當時沙田基覺小學校長盧光輝提議成立,並且得到當時沙田區政務專員曾蔭權撥款支持,係一支專門教導基層兒童打棒球嘅球隊。

據「山狗校長」盧光輝校長回憶返,當年佢係拉住30位「百厭」小學生成軍,每日放學之後佢都會親自帶球員操練逾1小時,跑步、投球、擊球、接球,真係一星期練足7日。

呢支球隊組成大概一年左右,就出參加香港少棒公開賽,當年有11支球隊參賽,沙燕隊隊員不斷過關斬將仲拎到冠軍,相當威水。亦都係因為呢段咁威水嘅經歷,沙田區議會同埋民政署就決定將鄉事會路嘅一條橋命名做「沙燕橋」以作紀念。

原圖嚟自網絡