過往都同史友們介紹咗唔少特色嘅公共屋邨,如果提到現時規模最細嘅公共屋邨,唔少單幢嘅公共屋邨好似東區康東邨、東區翠樂邨又或者沙田區顯耀邨都會上榜,但如果阿史講到曾經規模最大嘅公共屋邨,史友們又估唔估到有幾大呢?

望住呢兩張咁有味道嘅相,相信有返咁上下年紀嘅史友可能都會知道係慈雲山邨,呢個位於九龍黃大仙區嘅屋邨,前身係一個徙置區,喺1964年5月開始去到1971年9月期間陸續落成第3型到第6型嘅徙置大廈。提到建成嘅數字就真係嚇死人,足足建成咗62座徙置大廈,而原計畫仲係打算興建66座,但呢個數字已經足以令到慈雲山邨一度成為全香港擁有最多樓宇嘅屋邨。

之但係,由於早期呢類徙置大廈都係為咗安置無家可歸嘅難民,所以居住環境都係相當擠迫,亦都缺乏社區設施,成個屋邨主要就係得「慈雲山邨中央遊樂場」。再加上,慈雲山邨人口密度太高,規模太大,唔容易管理,亦都出現唔少罪案、童黨嘅事。

結果,喺1980年香港房屋委員會就將慈雲山邨分拆成慈安邨、慈樂邨、慈愛邨、慈正邨及慈民邨5個較細嘅屋邨,部分樓宇亦都提早拆卸。

原圖嚟自網絡