「一碗飯運動」喺英京酒家開幕？

早幾日阿史就同史友們介紹到抗日時期有個由宋慶齡喺香港發起嘅「一碗飯運動」，當時香港各界都為咗令到中國軍民有飯食而踴躍參加呢件事。當時威靈頓街麗山餐室老板溫梓明就帶頭捐出500碗飯，幾日之間就有13家餐飲店合共捐出5,000碗救國飯。

呢個「一碗飯運動」喺1941年5月初發起，去到7月1日嘅晚上就正式開幕，當時就喺灣仔著名嘅英京酒家舉行開幕典禮，由宋慶齡為香港各界嘅150幾人講解「一碗飯」嘅意義，當時喺大龐上面仲有宋慶齡捐贈嘅一啲孫中山先生生前嘅珍貴墨寶同埋其他文物，為一碗飯運動籌款，真係勞心勞力！

喺呢次大會成立之後，新聞界同埋文藝界都廣泛宣傳同埋動員，活動去到8月1日就成功籌到14,700碗飯，英京、樂仙等13家酒家仲一連三日接待「一碗飯運動」顧客，當時社會上嘅標語同埋宣傳畫都係叫緊「大家來吃愛國飯」，令到呢場運動喺中環、西環、灣仔等鬧市區廣泛流傳。