睇過王晶大導演大作《少年賭神》嘅史友,都應該記得有句金句「成日對住你笑,笑到你心都寒埋」。事實上,响近代中國史上都有位漢奸以「笑面」見稱,佢個名叫梁鴻志。

講到抗戰時期漢奸,可能史友們都諗起汪精衛陳公博等人,但其實梁鴻志都有佢嘅「標誌性」。梁鴻志出身名門,係清朝政治人物、文學家梁章鉅嘅曾孫,童年時曾响日本生活,後嚟返咗中國中咗舉人,仲入埋京師大學堂,可以話係一個叻人,以才氣見稱,係當時嘅著名文人。民國成立後,佢就任職國務院,仲獲委任為擁護袁世凱稱帝「請願聯合會」嘅骨幹成員之一。後嚟袁世凱稱帝失敗,佢就投靠咗皖系軍閥段祺瑞,亦係安福俱樂部成員之一。但隨住中國國民黨北伐成功,北洋軍閥失勢,佢亦隱居於北方。

到咗1937年,七七事變爆發之後,日軍就打算响佔領咗嘅地區建立一啲偽政權,扮係合法統治,一向親日嘅梁鴻志就成為佢哋嘅心水。佢哋睇中梁鴻志除咗佢响華北地區係「名人」之外,仲睇中佢人脈夠廣。佢出名以「笑面」迎人,特別係對任日本啲傳媒記者佢就極力配合。結果响1938年協助組織日本成立中華民國維新政府,出任行政院院長兼交通部部長。作為呢個偽政權嘅領導人,佢就唔係好睇得起另一位漢奸汪精衛,不過响日本施壓之下,佢就被迫任職於汪偽南京政權,仲做埋佢手下,始終佢同汪精衛相比,政治聲望差一大截。

當然,漢奸通常唔會有乜好下場,日本响1945年投降後,梁鴻志一家就隱居於蘇州。後嚟就被國民政府逮捕,最後被判死刑。

原圖:網絡