如果唔同史友們講呢張相嘅正確位置，大家又估唔估到呢個遺址嘅所在之處呢？近排內地又有一啲好特別嘅考古發現，今次就喺「絲綢之路」必經之地新疆昌吉州奇台縣唐朝墩古城，喺歷時三年嘅發掘之下，就搵到一排排磚砌通道同埋排水溝，起初都唔知道係咩類型嘅遺址。

直到近日，考古人員就肯定呢個地方其實就係高昌回鶻時期(即唐宋時期)嘅一個公共浴場。雖然話就話係過千年前嘅遺址，但考古人員就發現呢個面積有成300平方嘅半地穴式浴場結構係相當講究，下層係煙道、供熱空間去維持浴場水溫，所以係分成上下兩個封閉空間。而且，呢個浴場係有分成大堂、工作區同埋洗浴區，當中仲有細分冷水室、溫水室、熱水室、更衣室，真係估佢唔到。

無論喺形制布局、建築等方面都有濃厚嘅羅馬風格，而且牆面裝飾彩繪同埋遺址入面各類文物都有住濃烈嘅中原特色，基本上可以理解係東西方建築技術喺絲路上嘅交融，認真罕見。

原圖嚟自網絡