摩羅街大家應該唔單止聽過，可能仲成日去行，之但係如果講到「貓街」，唔知史友們又有冇聽過呢？其實，「貓街」正正就係摩羅街嘅匿稱，到底點解呢？今日就同大家介紹下啦！

摩羅街（Lascar Row），位於於皇后大道西與荷李活道之間，分成上街同埋下街，今時今日以買賣古董為主，喺1840至50年代，呢個地方就有間印度廟，有唔少印度人聚居同埋擺賣，而當時嘅華人係稱呼印度人為「嚤囉」，所以呢條街亦都叫做「摩羅街」。值得一提，摩羅一詞源自古代對來華伊斯蘭商旅Morramen嘅譯音，原理上並冇太多褒貶嘅成分。

言歸正傳，咁點解摩羅街會有「貓街」呢個稱呼呢？原來以前摩羅街都有部分攤檔古董店係會出賣賊贓，呢啲賊贓就係「老鼠貨」，咁當時嘅人就覺得買「老鼠貨」嘅人神情就好似貓見到老鼠咁，所以呢條街就叫做「貓街」喇！

原圖嚟自網絡