世界球王馬勒當拿

相信唔少史友們都知道一個好傷心嘅消息，就係一代球王馬勒當拿（Diego Maradona）因為心臟病而與世長辭，終年60歲。早前佢就因為頭部受傷而需要入院進行腦部手術，但估唔到手術出院兩個星期後就因為咁而過身，對世界各地嘅球迷嚟講呢個消息都好突然。

馬勒當拿離世，阿根廷總統下令宣布，全國哀悼三天，佢唔單止被視為係阿根廷嘅球王，佢仲係「世紀球王」。出生喺阿根廷貧困家庭嘅佢，自幼就好有足球天份，1976年就首次代表阿根廷國家足球隊出賽，18歲就幫阿根廷奪得世青盃冠軍。佢喺1982年就展開佢嘅歐洲之旅，加入西甲豪門巴塞隆納，其後又轉戰過拿坡里、西維爾等球會，聲名大噪。

而講到佢最威水嘅事，就當然係憑藉一己之力率領阿根廷隊第二次獲得世界盃冠軍，佢既係世界盃助攻王，又創咗世界盃過人、被侵犯次數最高嘅紀錄，喺前場任何嘅位置你都可以見到佢出色嘅技術，總之當年嘅球迷真係好幸福！