講到馬勒當拿,可能年輕一代波友要睇返啲舊時嘅比賽片段先知佢有幾好波。不過,可能有啲年紀大啲嘅香港波友,就曾經响現場一睹球王嘅精湛球技,因為三十幾年前,馬勒當拿就曾經嚟過香港。

响1982年,當時效力緊小保加嘅馬勒當拿,就跟隨球隊訪港踢咗場表演賽,對手係當時香港嘅班霸精工。當時嘅馬勒當拿,係阿根廷冒起得好快嘅球壇新星,名氣已經相當之大。至於呢間阿根廷球會點解會千里迢迢由南美嚟到亞洲踢表演賽,據講係因為球會財赤。

呢場表演場就响香港大球場上演,精工除咗有香港球星胡國雄坐陣外,仲請咗三位荷蘭同西德國腳級人馬客串出場。不過球迷們嘅焦點,都係集中响兩位10號仔身上,就係馬勒當拿同胡國雄。睇返當時嘅片段馬勒當拿似乎未盡全力,但兩球助攻已經令香港球迷們留下深刻印象。

球王訪港獻技,真係有今生無來世!

原圖:網絡