喺唔少影視作品又或者歷史上嚟講,和珅都被描述成一個超級大貪官,咁到底佢有幾貪,成世人有過幾多資產呢?今次阿史就同史友們介紹下啦!

和珅、鈕祜祿氏,字致齋,係滿洲正紅旗人,官拜正一品文華殿大學士、領侍衛內大臣兼領軍機大臣,總管內務府大臣,亦都係乾隆晚期到嘉慶初年權傾天下嘅一個官員。佢出生喺京城西城驢肉胡同福建副都統常保家,父母喺佢幼年嘅時候雙亡,雖然喺乾隆二十五年(1760年)成功考上咸安宮官學,但就因為佢當時嘅地位低微經常受到欺凌。雖然係咁,但佢18歲嘅時候就已經精通四書五經,仲識得滿語、漢語、蒙古語、藏語,深得老師器重,連直隸總督馮英廉個孫女都嫁埋畀佢。

和珅並唔係一開頭就有大官做,反而係科舉名落孫山,由文生員、三等侍衛做起,慢慢升到御前侍衛、戶部右侍郎、總管內務府大臣等嘅官職,認真傳奇。佢早年亦都唔係咩貪官,反而係同朝中清官一齊打擊福康安等官員,甚至有人向佢賄賂佢都唔接受。反來,隨住佢權力增長,自己又成為皇親國戚,有住乾隆帝寵信,慢慢就結黨營私,聚斂錢財。據近代嘅估計,佢親自經營工商業,開設當舖75間,設大小銀號300多間,甚至仲同英國東印度公司有住商業往來,咁多嘅資產令到佢成為18世紀世界首富。佢畀抄家之時,估計有八億至十一億兩白銀,另加全國千百萬頃土地以及219間房產,超過清朝政府15年來財政收入總和,認真誇張。

原圖嚟自網絡