尖沙咀火車站關閉

尖沙咀鐘樓今時今日就已經成為一個知名嘅旅遊景點，大家行過路過見到呢座建築可能都會停低影返張相咁，但其實呢座鐘樓原本並唔係一個獨立嘅建築物，而係尖沙咀車站嘅一部分。

尖沙咀車站，又叫做九龍車站，早喺1904年九廣鐵路定線果陣就已經落實會喺尖沙咀呢度起車站，而去到九廣鐵路1910年10月1日通車果陣，呢個車站就因為一戰嘅關係而仲未落成，要去到喺1916年先全面落成。由今日呢座鐘樓可以睇到，當時成個車站都係以紅磚同埋花崗岩建成，再睇返啲舊相，仲可以見到有埋拱門型結構，羅馬式石柱同埋尖頂等裝飾，真係幾靚下架！

雖然呢個車站係成個歐亞鐵路嘅東方終點站，但由於當時政府認為尖沙咀呢個地方太有發展價值，最終喺1975年11月29日就正式關閉車站， 1975年11月30日九廣鐵路總站遷至紅磡。