中國歷史上首創年號嘅皇帝——漢武帝劉徹

提起中國歷史上第一位皇帝，相信史友們都會答得出係邊個，之但係假如問到首創年號嘅皇帝，史友們又知唔知係邊個呢？

喺呢度阿史都唔賣關子喇，呢位就係漢武帝劉徹。佢係西漢第七位皇帝，喺7歲嘅時候就被冊立為儲君，後來就以16歲之齡登基，在位時間足足有成53年，係中國歷史上在位時間第三長嘅一位皇帝。喺佢在位年間，西漢商業貿易繁盛，兩次派遣張騫出使西域，開闢絲綢之路；國內亦都主張罷黜百家，獨尊儒術；但同時亦都窮兵黷武武力先後攻破唔少國家。

提到佢其中一樣創舉，正正就係創立年號。喺漢武帝之前嘅皇帝，其實就只係得年數而冇年號，漢武帝嘅年號就係喺佢在位十九年嘅時候首創，當時就係用「元狩」，至於點解要用呢個詞呢？據《漢書》上記載，原來喺漢武帝一次出去狩獵嘅時候，就捉到一隻獨角獸白麟，因為想紀念呢個吉祥嘅現象，所以就用到「元狩」呢個年號代表前122年，並且仲對之前嘅年號追加，例如就有「建元」、「元光」同埋和「元朔」。