呢幾日都同史友們介紹到和珅，亦都講咗《四庫全書》，咁自自然然就會講到一個話題，到底和珅、紀曉嵐嘅關係係咪好似啲劇集當中所描述咁，一對鬥氣冤家處處作對、互相爭鬥。

其實喺乾隆年間，和珅、紀曉嵐兩個都係朝中相當顯赫嘅人物，紀曉嵐就以聰明機智聞名，至於和珅去到後期就變到老謀深算、貪婪。而唔睇真係未必知，原來和坤同埋紀曉嵐嘅關係並唔係電視劇入面描述得咁差，喺歷史上乾隆比紀曉嵐大十幾歲，而乾隆又比和坤再大三十幾歲；換個講法，紀曉嵐五十幾歲嘅時候，和珅都只係二十出頭，所以其實三個人嘅年紀都差幾遠。

紀曉嵐屬於御用文人，編撰四庫全書，雖然喺文壇上有好大作為，但係喺政治上就比唔上權傾朝野嘅和珅，更遑論可以互相抗衡。再加上，其實喺職位上紀曉嵐更加係和珅下屬，處事圓滑嘅紀曉嵐仲不時會提醒年少氣盛嘅和珅，兩人嘅關係其實係幾良好架！

原圖嚟自網絡