日軍入侵香港

1941年12月8日，日本軍隊從廣東南下進攻香港，香港亦成為咗第二次世界大戰戰場嘅其中一部分。

日軍進攻香港，其實係日本「南方作戰」行動嘅一部分，呢個軍事行動內容包括突襲美國夏威夷嘅珍珠港，以及侵攻東南亞各地，包括西方國家响亞洲嘅殖民地，目的就係為咗奪取東南亞嘅天然資源，並確保從東南亞取得嘅資源可以安全輸送到日本，令日本响戰爭期間得以長期作戰。

日軍入侵香港係「南方作戰」中嘅C作戰，1941年12月8日，日本陸軍第38師團越過深圳河，進軍新界。由於當時駐港英軍防守重點係放咗响九龍醉酒灣防線同港島，所以日軍响新界地區無遇到太多攻擊。日軍就响12月9日開始對醉酒灣防線進攻，防線好快被攻陷，九龍半島亦响12月13日陷落。12月18日日軍登陸港島，雖然駐軍頑強抵抗，但終為日軍所敗，1941年12月25日，港督楊慕琦同英軍司令莫德庇決定投降，香港宣告淪陷，開始咗「三年零八個月」嘅黑暗歲月。