早兩日阿史就同大家介紹到上世紀嘅銅鑼灣，由於有四大日資百貨公司嘅進駐，推動咗百貨業喺香港發展，銅鑼灣當時甚至仲有「小銀座」嘅稱呼。日資百貨最早就出現喺上世紀60年代，咁購物商場又係幾時出現呢？

答案就係1880年代喇！當時香港第一間多層購物商場就係位於香港中環皇后大道中4號嘅柏拱行，呢座維多利亞時期嘅建築物係由猶太商人庇理羅士喺70年代尾出資興建，並且由巴馬丹拿建築師事務所設計，對面正正就係匯豐銀行總行大廈。

而呢個購物中心就喺1898年賣咗畀政府，其後就喺1960年4月1日先拆卸及改建成第二代拱北行，新嘅大樓樓高6層，有一條行人天橋連接炮台里，上層仲設有三間餐廳，政府新聞處辦公室亦曾經設立過喺呢度。去到1995年，大樓就連埋希爾頓酒店、花園道政府多層停車場一同拆卸，重建為今天嘅長江集團中心。

原圖嚟自網絡