香港第一個燈塔係點嚟？

如果就咁問史友們知唔知邊座係香港第一座燈塔，相信都會有人答得出係鶴咀燈塔，至於點解當時會興建呢座燈塔，史友們又知唔知當中因由呢？

鶴咀燈塔又叫做德忌立角燈塔（Cape D'Aguilar Lighthouse），位處港島南區鶴咀半島鶴咀之上，興建呢座燈塔原來同頻繁嘅海上貿易有關。自從香港開埠之後，海上貿易開始頻繁，當時就已經有西方商人提出過興建海上燈塔，甚至喺1867年英國海軍測量師里德中校(Commander Reed)提出喺香港最東面橫瀾島、南丫島同埋南邊嘅蚊尾洲三個理想地點，只係呢三個地方都係中國領土，並唔係咁易達成到協商。

直到1875年，當時政府先決定喺德忌立角（Cape D'Aguilar）興建第一座燈塔。燈塔最後喺1875年4月16日亮燈啟用，建成果陣高17米，以花崗岩建成可抵擋颱風侵襲。而燈塔入面就用咗煤、石油氣燈再加上折射原理，令到23海里以外都可以見到呢個位置。由於當時呢款燈塔係需要人手控制，所以就需要由英國請嚟一位看守員，初時都需要喺島上駐守足足一個月先有假放，認真艱苦。