日軍展開南京大屠殺

今日對南京民眾、甚至係全國國民嚟講都係一個傷感嘅日子，事關喺1937年嘅今日，日軍就喺南京展開咗長達6個星期嘅姦淫擄掠以及大屠殺，據統計每隔十二秒就有一個國人遇難。為咗銘記呢段歷史，悼念死難者，呢一日就被列為國家公祭日。

雖然阿史過往都為大家介紹咗唔少關於南京大屠殺嘅歷史，但喺今日都仍然有必要同大家再講述呢件事。繼盧溝橋事變後，日軍就喺1937年8月13日進攻上海並且與此同時都對南京實行無差別轟炸。本來以及可以幾個月內擊敗中國，但係喺淞滬會戰上就受到中國軍隊激烈抵抗，損失慘重。雖然日軍最後都佔領到上海，但日軍亦都顏面盡失。

1937年12月8日，日軍全面占領南京外圍一線防禦陣地；而去到11日晚上，蔣介石亦都表示電告唐生智「如情勢不能久持時，可相機撤退」；去到12月13日，南京陷落。喺日軍佔領南京冇幾耐之後，就開始對當地居民展開有組織、有計劃、有預謀嘅大規模屠殺、強姦同埋縱火。種種嘅暴行持續接近6個星期，喺呢段時間估計有30萬中國平民或者戰俘受到殺害，第一個月就有接近2萬中國婦女被日軍姦淫，南京城就有三分一嘅土地畀日軍燒燬，當年今日就係呢場反人類罪行展開嘅日子。