早前阿史介紹赤柱市政大樓,今次又係講下赤柱,因為赤柱有好多好值得講嘅地方。

响赤柱聖士提反海灘附近,有一個地方叫劏人排,嘩!咁得人驚嘅個名。呢個地方其實係一個離岸好近嘅礁石,有一個咁得人驚嘅名其實係同呢個地方恐怖歷史有關。相信史友們都知道,赤柱响開埠前係香港島一個好大嘅社區,開埠人口調查個陣就有成800個村民。而呢個地方,以往亦經常受海盜騷擾。據講清代個陣,每當捉到海盜,就會响呢個地方斬頭,所以呢個地方就叫劏人排喇!另外,阿史以前聽上咗年紀嘅親戚講,呢個地方响日治時期都係一個行刑之地,斬完頭就將條屍掟落海。嘩!都咪話唔得人驚!

原圖:網絡