早幾日就同史友們講到日軍喺發動太平洋戰爭嘅初期，就將香港訂為南方作戰嘅其中一個目標，並且喺12月8日當日就越過深圳河，正式進攻香港。經過接近十日嘅戰爭，醉酒灣防線同埋九龍半島嘅防線亦都相繼失守，英軍再次調整部署，決定將大陸旅撤返香港島。

隨住金山、魔鬼山等戰線陷落，酒井隆一度停火並且向楊慕琦遞交勸降書，但最後都係被楊慕琦覆函拒絶。喺1941年12月18日，經過日軍多日嘅炮火轟炸之後，寶馬山沿岸陷入火海、北角油庫亦都起火焚燒，濃煙隨東北風吹向英軍陣地，港島北岸大量探照燈失靈，英軍視野大為下降。日軍就分別喺北角、太古船塢、筲箕灣及愛秩序灣發動登陸戰，並且好快佔領咗西灣山、柏架山、畢拿山等作制高點，好快仲同英軍展開激戰。

原圖嚟自網絡