早兩日阿史就講過下中英兩國簽署《中英聯合聲明》,落實香港於1997年7月1日回歸祖國,而兩國達成協議其實係經過兩年幾嘅談判而得嚟。不過,响兩國談判初期,就一啲都唔順利。

根據中央政府嘅表述,中英談判分為兩個階段。中英談判第一階段係1982年9月時任英國首相戴卓爾夫人訪華至1983年6月,雙方主要係就原則同程序問題進行會談。响1982年9月24日,國家領導人鄧小平响北京會見戴卓爾夫人。响個次會面當中,中英雙方同意通過外交途徑就解決香港問題進行商談。不過,當時兩國就香港問題都有唔同立場。英國堅持三個不平等條約即《南京條約》、《北京條約》同《展拓香港界址專條》仍然有效,提出如果中國同意英國1997年後繼續管治香港,英國可以考慮中國提出嘅主權要求。但中國就表明香港主權屬於中國,並決定响1997年收回整個香港地區。

由於响第一階段英方响香港主權問題上立場不變,所以雙方磋商並無進展。响1983年3月,戴卓爾夫人寫咗封信俾中國總理,作出咗佢準備响某個階段會向英國議會建議將整個香港主權回歸中國嘅保證,呢個亦成為咗中英談判一個重要轉捩點,而中國政府亦同意盡快舉行正式談判。

第二階段就從1983年7月至1984年9月,兩國政府代表團就具體實質性問題進行咗二十二輪會談。不過,由於英方响第二階段會談初期仍然堅持1997年後英國繼續管治香港,因此雙方到第四輪會談都係毫無進展。咁個轉機係幾時出現呢?响1983年9月,鄧小平會見英國前首相希思時,就話英國想用「主權換治權」係行唔通,仲勸英國政府改變態度,以免出現到1984年9月中國要單方面公佈解決香港問題方針政策嘅局面。同年十月戴卓爾夫人來信提出,雙方可以响中國建議嘅基礎上探討香港嘅持久性安排。所以响第五、六輪會談中,英方確認不再堅持英國管治,亦唔謀求任何形式嘅共同管治方案。重大分歧同矛盾都解決咗,之後雙方協商就無咁多障礙喇!

原圖:網絡