近排內地嘅考古學界真係陸續都有啲大發現，繼喺圓明園發掘到「田字房」遺址之後，呢次嘅發現又係同古代嘅植物有關，就係喺浙江地區發掘到一個全球目前最早、面積最大嘅古稻田。

關於呢個位於餘姚市三七市鎮山谷嘅古稻田遺跡，發掘工作早喺9月就已經展開，據考古學者估計，成個遺址面積達到8萬平方米，而目前為止就只係發掘咗當中嘅7千平方米。

據目前了解，成個古稻田遺址大概可以分成三個時期，第一期原來可以推算到公元前4300年前嘅河姆渡文化早期，喺呢個時期嘅遺址，考古工作人員就搵到一條東西向凸起嘅田埂。而去到第二個時期，就係河姆渡文化四期，亦即係公元前3700年至3300年間，呢個時期考古人員就發現到有幾條人工田埂。

至於去到第三期，亦即係良渚文化時期，係有最多考古發現嘅一個時期，據講呢個時期就發現到好多條明確嘅田埂、當中就有鋪墊到木塊，縱橫咁構成一個個井字型，仲有埋排水口，亦都意味住呢個時期嘅古人已經識得規劃土地，有排水嘅概念，甚至仲有一個稻田系統。

咁幾千年前嘅田地又係種啲咩呢？經過專家檢測後，就發現水稻田堆積入面有小穗軸、穎殼、水稻等遺存，而且當中嘅植硅體密度比原本認定嘅5,000粒/克高出2到4倍，好大程度改變咗現代對於古代農業技術嘅認知。

原圖嚟自網絡