踏入十二月中，喺1941年嘅香港其實係進行緊激烈嘅一場攻防戰，多國組成嘅守軍齊集喺香港呢片土地，為咗一個共同目的，就係抵禦日軍嘅入侵。之但係，原來唔單止人唔希望日軍入侵，就連當年加拿大兵團都有隻神犬喺戰爭入面出盡力救同袍。

接下嚟阿史想介紹嘅正正就係義犬甘德捨命救同袍嘅故事。甘德（Gander）本身同主人住喺紐芬蘭，一家幾口生活本來好快樂，但就因為一次甘德唔小心整親鄰居嘅小朋友，一度就被捉到動物拘留所打算人道毀滅，但就畀附近嘅軍事基地接收，並且後來仲去埋加拿大嘅來福槍團，呢個時候就由原名Pal改名做Gander。

咁好地地喺加拿大，甘德又點解會同加拿大兵團嚟到香港呢？原來喺1941年嘅時候，日軍對得到香港嘅野心就已經相當大，當時經過多方協調之下，加拿大就派出溫尼伯榴彈兵團同埋根達所在嘅皇家來福槍團增援，甘德喺呢個時候就已經成軍隊一份子，仲有埋軍階。

去到1941年12月18日，日軍就喺鯉魚門，北角一帶登陸港島，負責協防嘅加拿大來福槍營就喺柏架山一帶佈防。喺入黑嘅時候，日軍就打算慢慢進攻，但當時甘德就趁黑偷襲咗幾個日軍，令到佢哋一度後退。時間去到12月19日嘅清晨，今次日軍就喺早上進攻，同加拿大兵團發激戰，期間日軍向傷兵嘅位置投擲手榴彈。據事後嘅描述，當時甘德係直接叼起手榴彈，向日軍嘅方向衝去，犧牲自己救咗同伴。

呢件事蹟一直流傳，去到2000年佢仲被授予Dickin Medal勳章，紀念甘德英勇嘅行為。

原圖嚟自網絡