新界區第一條公路——大埔公路

早排阿史就同大家介紹完新界第二條落成、一共分成二十二段嘅公路——青山公路，咁講完第二條之後就當然要介紹下成個區第一條公路啦！呢條就係大埔公路喇！

青山公路喺1911年先開始動工興建，但大埔公路就早佢好多，喺1902年已經落成，亦都因為有返咁上下歷史，所以又被稱為「舊路」。呢條公路一共分成9段總長22公里，由大埔林村、繞經新界東主要地區好似沙田、大埔，再去到九龍西部嘅深水埗一帶，呢個就係現時大埔公路嘅路段。

早喺英國接管新界嘅時候，就已經計劃對新界嘅交通基建進行改變，其中興建一條連接新界各區同埋九龍市區嘅公路就係首當其衝要做嘅一件事。呢條公路當年興建嘅時候唔單止係為咗經濟發展，仲有軍事嘅目的喺度。如果有史友記得，應該都知道駐港英軍就曾經有深水埗軍營同埋天祥軍營，呢兩個軍營都掌握咗兩條公路喺九龍嘅起點同埋新界嘅終點，所以去到日軍侵佔香港果陣，當時守軍都不惜要摧毀大埔公路嘅基建。